ક્યાં બાંધી જનાર છું? – જલન માતરી
Monday, December 5, 2011
તકદીરનો છું માર્યો, સમયનો શિકાર છું,
અડધો ચમનમાં અડધો ચમનની બહાર છું.
જન્નતની ના બગાડ મજા જગમાં ઓ ખુદા,
એનો તો કર વિચાર કે ત્યાં આવનાર છું!
દુનિયામાં અન્ય જેમ તને પણ ખીતાબતે,
કે’વાની શી જરૂર કે પરવરદિગાર છું?
ભાગે છે એ રીતે મને નીરખીને ઝાંઝવાં,
જાણે કે એને પકડીને હું પી જનાર છું.
એ પણ હતો સમય, હતાં મુજ પર દુઃખો સવાર,
આ પણ સમય છે, પોતે દુઃખો પર સવાર છું.
થોડુંક ધન કુબેરો મને પણ મળે તો ઠીક,
હું પણ તમારી જેમ ક્યાં બાંધી જનાર છું?
કંપી રહ્યું છે કેમ દુઃખોનું જગત ‘જલન’?
હમણાં હું તકલીફોની ક્યાં સામે થનાર છું?
0
comments
Subscribe to:
Post Comments (Atom)
