મુક્તક
Monday, June 22, 2009
ધરી છે જ્યારથી કરમાં કલમ જીવી ગયો છું હું,
હતો રજકણ છતાંયે સૂર્યસમ જીવી ગયો છું હું.
થયા છે એકભવમાં પણ અનુભવ એટલા મિત્રો!
કે એક જ જન્મમાં સો સો જનમ જીવી ગયો છું હું.
...મુસાફિર પાલનપુરી
કવિ છું ભોગવું છું આગવી રીતે હું જીવનને,
મધૂરપ જ્યાં ચાહું ત્યાં એકધારી મેળવી લઉં છું
મળે છે એક પળ જો કોઇની મોહક નજર મુજથી
તો હું એમાંથી વર્ષોની ખુમારી મેળવી લઉં છું.
....મુસાફિર પાલનપુરી
છે મુજ સ્વમાની જીવની એક જ અરજ ખુદા!
ગૌરવ હણાય એ ઘડી દેખાડજે નહીં.
પાડે ગરજ તો કોઇ સમંદરની પાડજે,
બિંદુની પ્યાસ આપીને રંજાડજે નહીં.
....મુસાફિર પાલનપુરી
ખૂબ ઉન્નત છે એનું પદ સમજો
વદ નથી કિન્તુ! છે શરદ સમજો.
દાદ દુર્લભ તો છે મુસાફિર ની,
પણ મળી જાય તો સનદ સમજો.
...મુસાફિર પાલનપુરી
મુક્તક
Tuesday, June 16, 2009
કોઇક હમાલ જેવું જીવે છે,
કોઇક ધમાલ જેવુ જીવે છે,
જેટલા માનવ એટલા જીવન,
કોઇક કમાલ જેવું જીવે છે.
ડૉ. અમૃતલાલ કાંજિયા
મુક્તક
કદીક લીલુંછમ હોય છે,
કદીક ખાલીખમ હોય છે;
પલટાતું રહે છે પલપલ,
હૈયું કેટલું માસૂમ હોય છે!
......ડૉ. અમૃતલાલ કાંજિયા
Subscribe to:
Posts (Atom)
